میرپور (کشمیر ڈیجیٹل)برصغیر کے عظیم روحانی پیشواء حضرت بابا پیرا شاہ غازی المعروف دمڑی والی سرکار کے291 ویں سالانہ عرس کی دو روزہ تقریبات کا آغاز 14 شعبان 1446 ہجری 13 فروری 2025 بروز جمعرات کو کھڑی شریف میں شروع ہوں گی ۔
غازی کشمیر حضرت پیرا شاہ غازیؒ کے عرس کے موقع پر میرپور میں مقامی سطح پر سرکاری طور پر عام تعطیل کا اعلان کردیا۔، ڈپٹی کمشنر (ڈی سی) میرپور نےعام تعطیل کا نوٹیفکیشن جاری کردیا۔
حضرت پیرا شاہ غازی ؒ کے عرس کے موقع پر تمام سرکاری دفاتر، تعلیمی ادارے اور پبلک سیکٹر بند رکھنے کا نوٹیفکیشن جاری کردیا۔ ڈی سی آفس، ایس ایس پی آفس، میونسپل کارپوریشن، اور ہر دوسرے انتظامی ڈویژن کو نوٹیفکیشن کی کاپیاں ارسال کردیں۔
حضرت بابا پیرا شاہ غازی رحمۃ اللہ علیہ کا سالانہ عرس جو کہ دمڑی والی سرکار کے نام سے مشہور ہیں، 12 سے 13 فروری تک کھڑی شریف، میرپور میں ان کے مزار پر مذہبی جوش وجذبے سے منایا جائےگا۔ تقریبات کیلئے سکیورٹی کے خصوصی انتظامات کئے گئے ہیں۔
عرس کا آغاز 12 فروری کی شام کو مغرب کی نماز کے بعد مزار شریف کے غسل کے ساتھ تقریب کا روحانی آغاز ہوگا۔ 13 فروری کو دربار کھڑی شریف میں اختتامی دعائیہ تقریب منعقد کی جائے گی جس میں حاضرین اجتماعی طور پر امن، اتحاد اور خوشحالی کیلئے دعا کریں گے۔
عرس کے دوران حضرت بابا پیرا شاہ غازی کی خدمات کو خراج عقیدت پیش کرنے کیلئے مذہبی اور ثقافتی تقریبات کا انعقاد کیا جائے گا۔ کھڑی شریف کا مزار اہم روحانی مرکز رہا جہاں لوگ صدیوں سے روحانی تسکین حاصل کرتے آئے ہیں۔ حضرت پیرا شاہ غازی کی اسلامی اصولوں اور پرامن زندگی کی تعلیمات نےنسل در نسل لوگوں کو متاثر کیا۔
مقامی انتظامیہ نے ایونٹ مینجمنٹ ٹیم کیساتھ مل کر سکیورٹی کے سخت انتظامات مکمل کرلئے۔ عرس کی مذہبی اور ثقافتی سطح پر اہمیت کو دیکھتے ہوئے مقامی انتظامیہ نے13 فروری کو میرپور میں عام تعطیل کا اعلان کیا تاکہ زیادہ سے زیادہ لوگ اس تقریب میں شرکت کر سکیں۔
